吳卓羲張曦雯甜笑默認戀情　男方大讚：做女友梗係無得頂！

藝人吳卓羲（Ron）及張曦雯（Kelly）被指因為拍無綫重頭劇《璀璨之城》戲假情真，以貓傳情。昨日（8日）二人出席劇集記者會，是傳緋聞後首度同場，立即成為焦點。雖然問到兩人是否拍拖時，Ron都會叫大家講返套劇，但雙方甜蜜之情溢於言表，Kelly甜笑大讚卓羲「好細心啦，好照顧身邊人啦，唔止身邊嘅演員，台前幕後都係，又有愛心⋯⋯」而問到Ron覺得Kelly做女友如何，他直言：「做女朋友就梗係無得頂！」

無綫台慶劇《璀璨之城》昨日舉行記者會，一眾演員出席，當中緋聞情侶Ron與Kelly成為全場焦點，兩人劇中飾演夫妻，傳戲假情真，更一隻貓兩份養。現場兩人合照時，向來玩得的Ron被要求跟Kelly合力派心，竟罕有面露尷尬，連「男仔頭」的Kelly亦一臉害羞。

問到是否拍拖，兩人均未有否認，Ron叫大家先集中注意力睇劇：「劇入面我哋幾相愛！（現實中？）我哋唔拍戲時都好照顧大家，一齊食飯傾吓劇本，好多人嘅。（唔係單獨？）我哋又未敢。（但你想嘅？）想㗎！」Kelly亦「夫唱婦隨」甜笑表示想單獨約會，Ron即說：「畀啲空間我哋先！」問是否因拍劇而撻着，Kelly按照Ron口脗叫大家先看劇中愛情線，至於是否稍後公開，Ron笑說：「到時話畀你聽囉！收視好嘅話。」

談到Kelly家中新貓貓「冬菇」被指是跟Ron共同收養，她即宣示主權：「冬菇係屬於我嘅！我係佢第一個媽咪，佢暫時喺一個單親家庭中長大。」Ron亦表示只看過「冬菇」的照片，未見過真身。問到發展機會，Kelly對Ron讚不絕口：「佢好好，愛小動物、孝順，講唔晒。（準備好迎接新戀情？）都OK。」Ron亦直言：「我隨時準備好，隨緣。（同Kelly有緣？）冇緣點一齊拍戲。（覺得Kelly有咩優點？）溫柔、大方、又靚、心地又好、做戲又專業又有愛心，非常好！完美到極點。」

聽Kelly對卓羲如此好評，似乎是「Boyfriend Material（男朋友材料）」，Ron亦自豪：「咁又係唔錯㗎我。」至於他覺得Kelly做女朋友如何？卓羲直言：「好好囉！做女朋友就梗係冇得頂！」而Kelly被問覺得卓羲做男朋友又怎樣，她甜笑說：「男朋友呀？唔錯吖。」講到會畀幾多分，卓羲說：「滿分呀！好未呀？」不過當問到有否戲假情真，Kelly就叫大家睇劇，卓羲就說：「感覺幾好，睇咗我哋《璀璨之城》先啦！」