林盛斌爆料遭張致恒多次借錢都未還　苦笑自認「戇居」

藝人張致恒（Steven）近年頻傳財困，自爆欠債達七位數，連日來多名債主包括蔡卓妍（阿Sa）、關智斌（Kenny）先後開腔回應。同樣身為債主之一的林盛斌（阿Bob）10月29日出席《夫妻肺片2》開鏡儀式時，一聽到「張致恒」三個字即連退數步，苦笑高呼「好驚你問呢啲嘢呀」，其後大爆張致恒過去五年多次以小朋友為由向他借錢，至今一毫子都未還過，更透露對方早前仍私下聯絡他企圖再借。

阿Bob表示，與張致恒早於對方剛出道的Boy'z時期已認識，當時他任職電台DJ，兩人關係密切，不時到對方家中打麻雀、外出玩樂。他看着張致恒一路走來的變化，坦言感到十分可惜與心痛：「好似佢每一個選擇都做錯咗，每一個決定都行錯咗。」

談到借錢一事，阿Bob坦承借過好幾次，但不願透露具體金額，只稱數目不算大。他提到，對上一次公開回應張致恒欠債已是五年前，這五年來對方「一蚊都冇還過」，反而之後又陸續借了幾次。阿Bob無奈表示：「一次、兩次、三次，去到第四次，我覺得真係要停。我啲錢都係辛苦搵返嚟㗎，搣開都係有血有汗。」

阿Bob直言，張致恒每次借錢都以小朋友為由，稱「屋企連小朋友奶粉、尿片都冇錢買」，令他於心不忍。他坦言：「某程度上，佢明白到可能呢樣嘢係最打動到我。」他亦提到，正如阿Sa所說，就當是給小朋友的利是錢，「始終養幾個唔容易，我自己都知」。不過他笑言，時至今日張致恒的孩子應該已不需要奶粉和尿片，這個理由「搞唔掂㗎了」。

問到兩人近期有否聯絡，阿Bob大爆張致恒早前仍有私下找他，企圖再次開口借錢。他長嘆一聲：「唉！早排再嚟嘅時候，我就覺得……無啦，無意思啦！」 他坦言，當初因為張致恒一次又一次承諾會還錢，自己選擇信任才一再借出，「我都覺得自己戇居！但係真心當佢係一個朋友先咁做」。

對於張致恒受訪時稱會努力賺錢還給朋友，阿Bob寄語對方「努力啲」：「娛樂圈暫時冇咩工作，咪出去做多兩份工、做part time囉。我身邊都有人經濟有困難，為咗還錢打兩、三份工。」 問到是否已預了對方不會還錢，他直言：「梗係冇得還啦！我預咗冇啦，佢有都還俾其他人先啦！不過如果佢還嘅話，我會好高興、好樂意嘅！唉！希望收得返！」