【蔡天鳳案】蔡母認曾欠鄺港智15萬元購物費　庭上斥對方「無良心」：十幾萬佢都計

28歲名媛蔡天鳳於2023年疑遭殺害及碎屍案，蔡天鳳前夫鄺港智、前家翁鄺球、前夫兄長鄺港傑被控謀殺及阻止合法埋葬屍體罪，案件於高等法院第14日審訊，蔡母張燕花繼續作供。在辯方盤問下，張燕花同意因鄺港智協助購物而欠下對方約15萬元；但她強調自己多年來「幫佢賣嘢都無計過」、「幫佢睇細路仔，一句多謝都無」，但鄺港智卻連十多萬元欠款也計較，斥鄺港智「無良心」。

代表鄺港智的大律師安華暉（Andrew Raffell）盤問張燕花時指，鄺港智從沒暴力對待過蔡天鳳，亦從沒作出威脅。張燕花對此回應指「之前就無」，但直至2022年6月，蔡天鳳與鄺港智就賣樓事宜常起爭執，鄺港智曾威嚇蔡天鳳不准出售加多利山單位。張燕花稱，曾向鄺家揚言「要走法律程序，法庭見」，鄺家最終才同意賣樓。

鄺港智一方質疑因張燕花憎恨鄺球而遭連累

辯方引述資料指，在2022年10月24日，鄺港智曾帶鄺球上律師樓，只因法律意見而未有簽委託書，但可見鄺港智願意賣樓。張燕花不同意，指女兒曾叫鄺港智賣樓但他不肯，直至「我鬧佢佢先肯」。

就鄺球簽賣樓委託書一事，鄺港智一方指張燕花在訊息中屢次稱呼鄺球為「臭頭子」、「垃圾球」，張又不滿鄺球起初不肯賣樓。鄺港智一方質疑，張燕花因憎恨鄺球，遂將鄺港智「拖落水」，令鄺港智遭連累。張不同意，指「鄺球係咩權利都冇，借佢個名，Alex叫佢點做就點做，到鄺球話事咩？」

辯方又引述蔡天鳳與張燕花之間的微信對話，提及在2022年10月至2023年1月期間，張燕花曾向蔡天鳳表示「昨晚ALEX上數37萬元」。辯方質疑，當時鄺港智支付約37萬元是為張燕花償還賭債。張燕花對此反駁：「無可能，佢有錢畀我？」、「從來佢都無可能幫我還錢，佢買嘢都係我出錢」。張燕花解釋，該筆款項與在內地賣車、出售海南物業有關。

辯方質疑張燕花根本不清楚鄺港智是否「在內地營商成功」，張燕花斥：「根本係廢話！我上大陸都睇過，乜都冇做，啲錢係亂使」、「佢乜嘢新鮮蘿蔔皮，唔好再吹啦。」張燕花強調，鄺港智的錢都來自蔡天鳳。

在蔡天鳳與張燕花的微信對話中，辯方又引述張燕花曾稱「媽今時今日欠他15萬」。張燕花庭上解釋指，該15萬是鄺港智協助她購物之用。惟張燕花強調自己「幫佢睇細路仔，一句多謝都無」、「幫佢買嘢都無計過」，惟鄺港智不但「一蚊都無畀過我」，更「15萬都收」，張燕花形容鄺港智「無良心」。

辯方指，但張燕花在上述欠款15萬的微信對話後稱「他在媽身上付出也大，這個媽也看見」。張燕花庭上回應：「冇可能，呢啲真係唔會，佢喺我身上真係一蚊都冇付出」。

張燕花否認曾「剪裁證供」

辯方一再質疑，張燕花「剪裁」證供以符合她的説法；張燕花則強調「無剪裁過，千其唔好咁冤枉我」。

辯方盤問期間又質疑張燕花有賭債、其座駕曾被淋紅油，而鄺港智曾替她還賭債。張燕花否認時這樣回應：「哇！你15歲嚟到我屋企，拍拖、生仔、結婚、離婚，我當你仔咁，你自己摸摸吓你個良心呀，畜生，你幫我還賭債？你咁都可以講呀畜生！」、「冇呢啲事呀，抹黑呀」；她並強調「我係畀人搞」。

三名被告包括鄺港傑、鄺球、鄺港智同被控一項謀殺罪及一項阻止合法埋葬屍體罪。控罪指三人於2023年2月21日，在大埔汀角路龍尾村56B村屋地下內謀殺女子蔡天鳳；以及在2023年2月21日至23日期間，於同地阻止合法埋葬蔡天鳳的屍體。三人否認謀殺罪。鄺港傑及鄺港智承認阻止合法埋葬屍體罪，鄺球則不承認阻止合法埋葬屍體罪。

案件編號：HCCC 198/2025

蔡天鳳案相關報道