梁敏巧高調曬翻版Usagi公仔捱轟　事後道歉：「可能要自己報返東張」

「東張女神」梁敏巧（Maggie）昨日（23日）在動漫電玩節被偶遇，對方拍片訪問她，其後她並上載到社交平台後，被眼利的網民踢爆她最愛的公仔Usagi竟然是假貨，引起版權爭議，即時惹來fans批評，着她應該支持正版。

雖然她事後已在社交平台發文澄清並已下架片段，她接受訪問時向觀眾道歉，直認是自己的疏忽，指很多公仔都是朋友及粉絲送贈，基於信任未有逐一查核真偽。

梁敏巧昨日在社交平台發布一段開箱影片，穿上動漫角色Usagi睡衣直擊家中過百件相關珍藏單品。她在鏡頭前興奮地挑選出10件最喜愛物品向大眾逐一介紹，涵蓋公仔、化妝品及餐具等各類日常用品。然而影片去到尾聲時畫風突變，她突然拿著兩隻公仔高調表示：「最尾呢就係翻版嘅Usagi！唔好問我邊度得返嚟，總之就係好得意啦！」這番言論瞬間觸發大批網民神經並惹來狂轟。

事後梁敏巧直認是自己疏忽，並解釋道：「咁我都係好想喺度同品牌方講聲對唔住啦，因為呢個係一個不當嘅示範嚟嘅，咁另外呢，其實我都真係有畀錢去買呢啲公仔，我喺香港嘅實體舖買嘅，咁我就真係買咗啲翻版啦，但係用正常嘅價錢而且佢同我講係正版嘅，咁我都會向呢間舖頭追究嘅。」

對於下一步，梁敏巧表示自己會跟店鋪反映事件：「因為具體點樣做其實我都唔係好清楚，我要問返我認識嘅律師朋友，睇下佢教我點樣去做。」至於被問到「會否自己報返東張」，她坦言：「真係好頭痕，真係冇諗過原來純粹想分享下一啲心頭好，所以就搞出呢個咁嘅大誤會，真係可能要自己報返東張。」

早前亦有不少藝人因擁有假貨而遭批評，如鄧麗欣孭Hermès包包被質疑是A貨、陳慧琳孭A貨LV驚動娛圈。