全力支持「香港五年規劃」公眾諮詢，提出大埔發展建議 文：駱小鸞

作為大埔區區議員，我日日同街坊打交道，深明香港未來發展同每個市民嘅生活息息相關。特區政府現正就首個五年規劃做公眾諮詢，呢個係香港對接國家「十五五」規劃、融入國家發展大局嘅重要一步。我全力支持呢份有前瞻性、策略性同可操作性嘅指導文件，並提出以下建議，希望凝聚共識，推動香港高質量發展，等大埔以至全港市民都可以分享到國家發展嘅紅利。

鞏固金融貿易中心地位：推動大埔綠色物流示範區

我高度認同規劃話要「鞏固提升國際金融、貿易、航運及航空中心地位」，特別係「背靠祖國、聯通世界」呢個定位，以及推動大宗商品交易同高增值供應鏈服務嘅方向。大埔作為新界門戶，交通基建同土地資源都有優勢，可以成為北都產業發展嘅重要配套支點。我建議響推動國際貿易中心同高增值供應鏈服務嗰陣，優先考慮響大埔設立「綠色物流與專業服務示範區」，結合北都產業園，吸引檢測認證、貿易融資同供應鏈嘅科技企業落戶；同時，善用香港廣東社團總會呢類網絡，加強同大灣區同海外華商嘅經貿聯繫，幫香港企業「走出去」同海外資源「引進來」。咁做唔單止可以為大埔居民創造更多優質就業機會，仲可以強化香港作為國際中轉樞紐嘅競爭力。

加快創科發展：打造大埔鄉村創科同銀髮科創試點

其次，對於加快建設國際創科中心同產業發展規劃，我完全支持北都大學城及醫療創新樞紐嘅建設，呢啲同大埔毗鄰北都、擁有郊野同社區資源嘅優勢好夾。建議打造「大埔鄉村創科微型試驗場」網絡，利用大埔現有嘅鄉村同農地資源，聚焦智慧農業、生物科技同碳匯技術，同河套香港園區同新田科技城形成「研發—試驗—轉化」嘅閉環；同時推動「銀髮科創村」試點，響大埔舊區更新中融入AI輔助養老同中醫養生科技，連接北都醫教研醫院，等長者唔單止可以安老，仲可以參與創科應用測試。呢啲措施可以有效打破土地限制，培育本土人才，幫香港打造國際高端人才集聚高地同醫療創新樞紐。

深化民生福祉：提升大埔房屋、教育同安老服務

民生同社會發展係社會持續發展嘅根本，我特別支持響教育、醫療、房屋、社福、安老呢啲方面嘅務實方向。大埔區人口結構多元，高齡化壓力明顯，社區服務需求好大。建議加快公營房屋供應同舊區更新，善用北都新增嘅土地資源，做到職住平衡；同時大幅增加簡約公屋單位（即係簡樸房），以有序取代劣質劏房，填補短期公營房屋供應缺口，幫助輪候傳統公屋多年的基層市民提早上樓，為基層市民提供安全、衛生同適切嘅過渡房屋選擇，切實提升基層居住質素。響教育醫療安老方面，強化STEAM同國民教育，完善基層醫療同社區健康中心，深化「居家安老為本」，響大埔推廣長者友善社區同護老者支援服務，並探索跨境養老嘅便利措施；此外，要平衡輸入勞工同本地就業，加強在職家庭託兒同再培訓支援，等街坊可以更好地融入新產業，真係增加市民嘅獲得感、幸福同安全感。

推動文體旅融合同綠色轉型：建設大埔宜居創新示範區

最後，對於規劃提出嘅「文體旅」協同發展、綠色生活同城市韌性，我覺得同樣重要。大埔有豐富嘅郊野公園同文化底蘊，係香港嘅「後花園」，建議打造「大埔自然創新節」品牌IP，融合生態導賞、創科展覽同社區文體活動，連接北都盛事經濟，吸引高增值旅客同大灣區遊客；同時，先行先試「無廢零碳社區」認證，響大埔新舊區更新中推行綠色建築、社區微電網同AI廢物分類，成為全港綠色宜居示範區，呼應國家「雙碳」目標，並加強城市韌性建設，提升防災減災能力，建設智慧城市同長者友善空間。透過文體旅協同同綠色生活，可以全面提升大埔以至香港嘅城市吸引力同市民生活質素。

我呼籲全港市民踴躍參與公眾諮詢，一齊書寫香港由治及興嘅新篇章。等我哋攜手推動北部都會區建設、創科發展、民生改善同綠色轉型，實現香港長期繁榮穩定！

文：駱小鸞

中華海外聯誼會理事、大埔區區議員、香港廣東社團總會高級行政人員

＊作者文章觀點，不代表堅料網立場