鄭秀文啟德演唱會因舞台機件故障延期　原定時間變「答謝會」予已購票人士入場

樂壇天后鄭秀文(Sammi)原定於本周五(10日)起一連三日在啟德主場館舉行三場《You and Mi concert》亞洲巡迴演唱會最終站，但主辦方寰亞娛樂今日(6日)突然宣布因發現舞台有重要部件出現故障，存在安全隱憂。基於安全考量，宣布演唱會延期，原定日子將改為免費的「答謝會」(粉絲見面會)。

寰亞解釋指，由於在演唱會搭建過程中，發現有重要部件出現故障，稱：「為演出安全及呈現完整的演唱會原有效果，經慎重考慮後，通知歌手鄭秀文(Sammi)有關將演唱會延期舉行的決定。有關演唱會延後日期及票務安排，主辦單位正積極籌劃，在梳理細節後會盡快通知大家。已購票之觀眾請保留演唱會完整門票（連同票根），並密切留意主辦單位日後的公佈。屆時可選擇申請退款或保留觀賞延期演唱會之權利。」

面對這個突如其來的變動，寰亞跟Sammi希望想出最好的解決方法，答謝已購票觀眾的體諒和支持，因此將特別安排於原定日期(2026年7月10日至12日晚上7時30分)及地點，舉辦約1.5小時的「答謝會」。屆時Sammi將親身與大家見面，雖然舞台設計及效果只能從簡，但她仍會而歌會友，答謝一直支持的忠實歌迷。

是次已購票並持有有效門票的人士，均可憑票按原定日期及座位編號，免費參加今次「答謝會」。主辦方特別提醒，觀眾參加完答謝會後，請謹記保留演唱會完整門票(連同票根)。待日後公布演唱會延期的後續安排時，歌迷仍可選擇申請退款，或保留再次入場觀賞延期演唱會之權利。有關鄭秀文啟德演唱會2026的最新票務安排，請密切留意主辦單位官方平台發放的最新公告。

對於演唱會需要延期，Sammi對此表示震驚，尤其對受影響的觀眾及歌迷深感抱歉，並立即想出補救方案。她說：「關於演唱會延期，我覺得需要向觀眾和買咗飛嘅朋友親自交代。其實我比大家早一日知道，昨日大約中午我收到公司通知需要延期。當時為演唱會做緊準備，如火如荼，整個團隊同我都好ready開騷。突然收到呢個通知，我有啲震驚，當然亦有失望，畢竟除咗我，仲有好多團隊、公司同事，付出咗好多心血，諗咗好多好開心、好興奮嘅內容。」

她續稱：「臨開騷前收到呢個消息，當然唔好受，當下我係好失望，但我個腦第一件諗到係啲歌迷點算？買咗飛嘅觀眾點呢？好多歌迷特登飛嚟，訂機票、酒店，為咗睇Sammi演唱會花咗好時間、心機、金錢，嗰刻我心急如焚：『我應該點呢？』我第一吓『歌迷點呢？買咗飛嘅觀眾點呢？』」

Sammi又指「第二，我對於公司決定，係理解，我用咗好短嘅時間去消化呢個通知，我覺得作為公司要做呢個決定係相當艱難，我理解，呢個決定亦相當審慎，將『安全』放大前題，係正確，對於公司決定我表示尊重。」

她最後再一次表示抱歉，並說：「我要再講一次，我真係好抱歉、好抱歉，對於買咗任何一場飛嘅觀眾，為你哋做成不便。情感上嗰種痛、嗰種傷害，金錢、時間、心路歷程、為咗撲飛花咗嘅心血，我真係好抱歉。去到呢刻竟然發生呢件事，相當之抱歉，我應承大家喺呢三場答謝會，我同我團隊一定會盡一切努力，希望可以補救大家一啲損失。我唔敢期待所有人理解，我會盡力做好自己應該要做嘅嘢，多謝大家！」