馮盈盈Bra Top拱橋晒腹肌　網民對比十年前讚更弗

前港姐冠軍馮盈盈於社交平台上載健身拍攝花絮短片。片中佢穿上運動內衣，牛仔褲鈕扣刻意唔扣好，露出內褲邊，大方展示結實腹肌同健美體態。面對鏡頭不斷轉換姿勢，仲做出拱橋動作，將腹部線條盡顯出來。

馮盈盈2016年奪香港小姐冠軍，轉眼入行已經十年。呢幾年積極操練，身體線條比起參選時更加緊緻。短片入面腹肌、馬甲線清清楚楚，體格結實。不少網民拿佢而家同十年前港姐時期對比，大讚而家狀態「勁過十年前」。

馮盈盈於帖文提到，事業固然要搏，但飲食、訓練、休息三方面都要好好善待身體，千祈唔好偷懶搵藉口，亦借呢段花絮呼籲大家注重健康。

馮盈盈受訪講到，早前同一眾港姐師妹去湖南拍外景。當地菜式香辣惹味，自己忍唔住多食，體重隨即上升。 佢大讚一眾師妹自律，堅持運動同飲食控制維持狀態，特別點名魏欣，讚佢身形纖瘦又充滿線條感，體態健美。為咗港姐決賽可以同師妹們以最佳狀態同場亮相，返港之後馮盈盈馬上加強訓練、嚴格管理飲食。

馮盈盈一直自我增值，2023年重返港大修讀食品產業管理市場營銷碩士，更加取得一級榮譽畢業。早前亦接下內衣品牌代言，拍攝多輯性感宣傳相。

佢由2018年接觸健身，八年期間雖有斷過練，但每一次重新起步都有教練協助指導，馮盈盈亦發文多謝教練一路陪伴，令自己變得愈來愈強壯。

片段流出引來網民熱烈討論，焦點大多落在佢亮眼腹肌。 網民留言：「盈盈真係操得好fit，啲腹肌好明顯」、「平時睇唔出原來咁有料到」。好多人認同佢嘅健康性感路線，直言「呢種健康美比起單純露肉吸引好多」，仲有網民笑佢身形靚到「完美得像AI」。